Poslovne vijesti - Makedonija

Создавање македонски текстилен бренд - спас од кинеската конкуренција

Текстилната и кожарската индустрија во Македонија по кризата од 2009 година, од четвртиот квартал на минатата година работат со полна пареа.

Сепак, за да финалниот производ биде конкурентен на странските пазари неопходно е државата да ги намали царинските стапки на репроматеријалите што се увезуваат од главно од Кина. Ова е ставот на Ангел Димитров, претседател на Здружението на текстилната индустрија и конфекцијата при Стопанската комора на РМ, кој смета дека домашните текстилци треба што поскоро да почнат да извезуваат наш домашен бренд или да даваат комплетна услуга за странските брендови.

- Зголемувањето на цената на памукот на светските берзи ги зголемија цените на македонските текстилни изработки, бидејќи 93 проценти од вкупното производство е насочено кон лон работењето, односно извоз на работна рака, а не наши брендови и готови стоки - појаснува Димитров.

Во текстилната индустрија се вработени околу 42.000 работници или 40 проценти од вкупната преработувачка индустрија во земјава. Димитров смета дека царинската стапка за увоз на репроматеријали во земјава е поголема отколку во Германија и затоа е потребна нејзина корекција.

- На состанокот што го договоривме во Министерството за економија бараме да се намалат давачките од плата, особено придонесите да бидат според реалната заработувачка, а не на минималната основица која изнесува 50 насто од просечната бруто-плата што достига 14.500 денари - објаснува Димитров.

Според него во овој сектор придонесите во однос на нето-платата се качуваат за неверојатни 80 проценти, а во другите гранки учеството е околу 28 отсто. Просечната нето плата во текстилната индустрија изнесува околу 9.500 денари, а во моментов има недостаток на околу 1.000 текстилни работници во штипскиот реон каде што се концентрирани и најмногу текстилни фабрики.

Сашо Деспотовски, претставник на Стопанската комора, укажа дека со слични проблеми се соочува и кожарската индустрија.

- Во 2010 година од овој сектор извезени се 86,2 милиони долари кожени производи и обувки, што е 2,6 отсто од вкупниот извоз на земјава, а од нив 74,6 милиони долари се извоз на обувки. Истовремено увезени се кожарски производи и обувки во износ од 63,7 милиони долари, при што околу 50 отсто отпаѓа на обувките - информира Деспотовски.

Според него за последниве 6 месеци цената на кожата е зголемена за 300 насто, а на хемикалиите околу 15 проценти.

- Покрај овие проблеми нелојалната конкуренција исто така влијае на работењето на овој сектор, бидејќи во земјава се увезуваат обувки од Кина кои се поевтини од 2 евра - вели Деспотовски. Тој нагласи дека соседна Бугарија донела закон со кој не се дозволува увоз на обувки по цена пониска од 7 евра и смета дека нешто слично треба да се воведе и кај нас.